كبة الراهب 
هالوصفة الشهيه احد وصفات نكهة عربيه و كانت هل المرة من بلد الارزة لبنان الجميل عرفتنا عليها الصديقة الرائعه نورما العلي و هالصورة هي تطبيقي لهل الوصفة الشهيه و بنصحكم جدا اتجربوها رح تعجبكم على ضمانتي ,,بتركم مع المقدمه التعريفيه عنها متل ما وردت من صاحبة الوصفة :)

هالاكلة قصتها حكاية من اكلات التراثية وبالذات بالضيعة اللبنانية متل ما بتعرفوا تشتهر الضيعة اللبنانية بالمونة واهمها البرغل وبتكتر اكلات البرغل بالشتوية واكلتنا اليوم تراثية بامتياز ومتل ما بيقولو عنا وباللهجة واللبنانية من احلا الاكلات الضيعجية اسمها كبة الراهب وتنعمل كتير بالشتوية وبالذات كانوا يتدفوا على صوبية الحطب وكانت ست البيت تحط طنجرة الطبخ عالصوبية كانت الصوبيات كمان متل الفرن الها جارور للخبز بذكرها قديما عند اهلى حاصلهم طنجرة كبة الراهب عالصوبيا من فوق وصينية الكبة بجارور الصوبيا
المقادير
مقادير العجينة :

3 اكواب برغل ناعم بصلة
2 كوب طحين
ملح

كمون قرفة وفلفل اسود.
ولنسوي الكرات :
2 لتر مي
توم مهروس
نعناع ناشف ملعقة نشا
دبس رمان 2 ملعقة وربع كوب زيت زيتون
للحشوة:

نص كيلو بصل 2 ملعقة اكل سماق ربع كوب جوز مفروم وملح وربع كوب زيت زيتون على وجه الصنية 

الطريقة :

كبايات برغل ناعم للكبة نغسله ونرمي ميته ونتركه مبلول شي ساعة ليتش البرغل بعدها نفركه شوي عالايد ونبخه بربع كوب مي شوي شوي وبعدها نطحنه على مكنة اللحمة بعدين نطحن بصلة كبيرة مع شوية من البرغل ونزيدها عليهم ونزيد البهارات فلفل اسود نص ملعقة شاي كمون قرفة وندعك البرغل بعدها نزيد عليهم 2 كوب طحين شوي شوي وكل ما زدنا طحين نبخ بخة خفيفة ماء وندعك لتصير عنا عجينة دبقة جربيها كوري قطعة صغيرة وشوفيها اذا تكورت منيح وما فتت يعني العجينة كويسة ونقسم العجينة ربع و3 ارباع ربع نقطعه كور صغيرة قد حبة المشمش نكورها وبالنص ندخل الاصبعوشوي ليصير فيها تجويف بعدها نغلي 2 لتر ماء ونسقط الكور فيهم نتركهم يغلو على نار خفيفة 10 دقايق بعدها نضيف 4 حص توم مهروس 2 ملعقة دبس رمان ربع كوب زيت زيتون وملح ونص ملعقة شاي نعناع ناشف وملعقة نشا كبيرة ندوبها بملعقة ماء ونزيدها بس ليتقل الصوص شوي ونطفي عليها نجي لقسم العجين التاني نحضر الحشوة نص كيلو بصل نقطعه شرايح وندبلو بزيت زيتون ويعدها نزيد عليه 2 ملعقة اكل سماق وربع كوب جوز مفروم خشن ورشة شطة وملح بعدين نرق طبقة عجين نحطها في صينية مدهونة زيت نحط الحشوة ونرجع نغطيها بطبقة عجين نقطعها متل ما تحبو شكل التقطيع ونحط عليها ربع كوب زيت زيتون وندخلها الفرن نص
ساعة وكم دقيقة من فوق لتنشوي ·

Find me on : 

 

All the photos on my blog are copyright protected. If you want to use any of them, please let me know and provide a link to credit my work.

 

  • Facebook - Black Circle
  • Pinterest - Black Circle
  • Instagram - Black Circle